Diputatu nagusia aukeratzea - www.jjggalava.eus
Diputatu nagusia aukeratzea
Lau urterik behin, Batzar Nagusietako hauteskundeak burutu ondoren, behin batzarrak osatuta eta Mahaia aukeratuta, Arabako Lurralde Historikoaren Erakundearen Antolamenduari buruzko Foru Arauak xedatzen du, gehien jota hogeita hamar eguneko epean, Osoko Bilkura bat egin behar dutela eta gai-zerrendak gai bakarra izango duela, diputatu nagusia izendatzekoa, alegia. Batzar Nagusietako Lehendakaritzak, Mahaia eta Bozeramaileen Batzarra entzun ondoren, zehaztuko du zein egunetan izango den Osoko Bilkura hori.
Arabako Batzar Nagusietako Araudiak dio diputaturako hautagaien proposamenak Batzar Nagusietako Mahaian aurkeztu behar direla, proposamena egiten duen taldearen bitartez, osoko bilkura egin baino behintzat hirurogeita hamar ordu lehenago.
Araudiak jaso du zein izango den osoko bilkura horren gai-zerrenda; hasteko eta behin, Mahaiko idazkarietako batek proposatu diren hautagaien izenak irakurriko ditu; hautagaiek hitza hartuko dute eta gobernu-programa azalduko dute.
Ondoren, batzarkide-taldeetako ordezkariek hartuko dute hitza eta erantzuteko txanda bat ere izango dute. Eztabaida amaitu ondoren, bilkura eten egingo dute eta Mahaiak adieraziko du bozketa zein ordutan egingo duten.
Bilkurari berriz ekiten zaionean, zuzenean bozketa egiten da. Lehenengo bozketan hautagai batek batzarretako gehiengo osoaren botoak lortu baditu (eskubidezko kide erdiak gehi bat), diputatu nagusi izendatuko dute batzarkide hori. Bestela, bozketa egingo dute eta diputatu nagusi izendatuko dute botoen gehiengo soila lortzen duena. Bi hautagaien artean berdinketa eman daiteke; kasu horretan diputatu nagusi izendatuko dute boto kopuru handiena lortu duen talde politikoko edo koalizioko hautagaia.
Ondoren diputatu nagusiak kargua hartuko du Batzar Nagusietako lehendakariaren aurrean eta kargua zin edo aginduko du honako formula honen bidez: “Zin (edo agintzen) dut Arabako Foruen, erabilera onen eta ohituren alde egingo dudala, autogobernuaren eta askatasunaren ikurrak baitira, Justizia areagotzeko".