Lehendakariaren agurra

Atsegin handiz egiten dizuet ongietorria Europako parlamenturik zaharrenetakoa den honetara, Arabako herriaren kezken, beharren eta funtsaren bozgorailu sendora.

Arabako Batzar Nagusiek zeregin erabakigarria betetzen dute gertuenetik eragiten diguten arauak garatzen; gure gizarte-politiketan, gure ekonomian, gure natura-ingurunean, familien egunerokoan, kontzeju eta kuadrillentzako laguntzan, eta Araba lurralde oparo, jasangarri, tradizional eta aldi berean berrikuntzaren abangoardia egiten duten aukera bereizgarrietan.

Legebiltzar honetan, foru-arauak proposatu, eztabaidatu eta onesten dira, Lurralde Historikoen Legeak eskumenak aitortzen dizkigun gaietan: besteak beste, gizarte-laguntzako baliabideak, zerga-politika, nekazaritza, errepideak, kultura, klima-larrialdia… Batzar Nagusiak, gainera, ahotsa dira Arabarentzat ukaezinak diren hainbat baliorentzat: hala nola Berdintasuna, Elkartasuna eta Giza Eskubideen Defentsa.

Arabarrok, erantzukizunez eta harrotasunez, geure etorkizuna ezar dezakegu, lege-ekimenen bidez: foru-arauen bidez. Halaber, lurraldeko parlamentua garen aldetik, lurraldeko gobernua den Arabako Foru Aldundiaren kudeaketa kontrolatzeko gaitasuna dugu, proposamenen eta mozioen bidez eta foru-gobernuko diputatuei galderak eta interpelazioak eginez.

Gonbidatzen zaitut Batzar Nagusien benetako garrantzi eta norainokoa ezagutzera webgune honen bidez. Erabateko sarbide gardena duzu hemen, batzarkide-talde guztien eguneroko jardueraren berri izateko, dokumentu historikoak kontsultatzeko, gure egoitzak bisita birtualen bidez ezagutzeko eta gure ateak beti irekita aurkitzeko zure iradokizun eta gogoetei. Hau da zure etxea!

Irma Basterra Ugarriza