Osoko bilkuran jorratutako gaien laburpena - www.jjggalava.eus

Arabako Batzar Nagusiek beste osoko bilkura bat egin dute gaur goizean, Arabako Foru Aldundiaren gobernuaren, antolaketaren eta araubide juridikoaren foru-arauaren proiektuari buruzko irizpena onartzearekin batera. 10/2023 Foru Araua aho batez onartu da.

Ondoren, Lurralde Historikoko ordezkaritza-organo gorenak lau mozio eztabaidatu ditu, Elkarrekin Araba (Podemos-Ezker Anitza-Equo) batzarkide-taldeak gai-zerrendan aldez aurretik sartutako mozioetako bat kendu ondoren. Lehenengo biak, gaiaren antzekotasuna dela eta pilatuta eztabaidatu zirenak, batetik, Pedro Sanchezen gobernuak Gasteizen proiektatzen duen Errefuxiatuen Harrerarako Zentro berriari buruzkoa zen, Arabako Popularren taldeko Ana Morales prokuradoreak aurkeztua; eta, bestetik, Arabako harrera-baliabideei buruzkoa, EH Bilduko Eva Lz de Arroyabe prokuradoreak osoko bilkurara eramana. Puntu honek bukatu du, alde batetik, Arabako Popularren mozioa atzera botatzeaz eta, beste aldetik, EAJk eta Euskal Sozialistek EH Bilduren mozioari aurkeztutako ordezkapen-zuzenketa onartzeaz, EH Bildu, Arabako Popularrak eta Elkarrekin Araba (Podemos-Ezker Anitza-Equo) taldeen kontrako botoekin.

Jarraian, Elkarrekin Araba (Podemos-Ezker Anitza-Equo) taldeko bozeramaile David Rodríguezek ekimen bat aurkeztu du Arabako Foru Aldundiak jabetza publikoko azpiegitura eraikitzea eta birgaitzea bultza dezan, bizitegi-eredu publikora bideratzeko. Aurkeztutako erdibideko-zuzenketa atzera bota da eta, horren ordez, EAJ-PNV eta Euskal Sozialistak batzarkideek aurkeztutako zuzenketa onartu da, EH Bildu eta Elkarrekin Araba (Podemos-Ezker Anitza-Equo) taldeen kontrako botoekin eta Arabako Popularren abstentzioarekin.

Azkenik, Kike Fz de Pinedo EH Bilduko bozeramaileak Arabako mahastizaintza eta ardogintza sektorerako estrategia integral baten beharrari buruzko eztabaida ireki du. Mozioa atzera bota dute eta, horren ordez, EAJ-PNV eta Euskal Sozialistak batzarkideek aurkeztutako zuzenketa onartu dute, Arabako Alderdi Popularraren eta Elkarrekin Arabaren (Podemos-Ezker Anitza-Equo) aurkako botoekin eta EH Bilduren abstentzioarekin.

Batzordeen eta osoko bilkuraren bilerak zuzenean jarraitu daitezke Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.