Batzar Nagusietako lehendakariak Nekaturreko presidentea eta gerentea hartu ditu - www.jjggalava.eus

Irma Basterra Batzar Nagusietako lehendakariak Eneko Goiburu Nekatur Euskadiko Landa Ostatuen Elkarteko presidentea eta Idoia Ezkurdia gerentea hartu ditu  Arabako legebiltzarraren egoitzan. Bilera hau lehendakariak legegintzaldia hasi bezain laster hasitako agendan kokatzen da, Batzar Nagusien jarduera lurraldeko eragile sozial, ekonomiko eta kultural nagusienei hurbiltzeko.

Lehendakariak eskerrak eman dizkio Nekaturri, "zuen batzar nagusia egiteko egun gutxi falta direnean. Zuen lana gertutik ezagutzen dut eta zorionak eman behar dizkizuet. Euskadiko landa-turismoa kalitate handiko estandar batera eraman duzue landa-ostatuen bidez. Duela gutxi, modu positiboan baloratzen zenuten 2023. urtea, eta, bereziki, garai jakin batzuetako emaitza historikoak, hala nola Gabonak Araban ". Alde horretatik, Irma Basterrak zoriondu egin ditu: "Zalantzarik gabe, gure landa-ingurunearen iraunkortasuna eta funtzio-aniztasuna zaintzeko, bertako biztanleen ongizatea eta bizi-kalitatea hobetzeko eta Arabaren ekonomia-, gizarte- eta lurralde-kohesioa bultzatzeko ere lan egiten duzue. Gure herriak gozatzeko lekuak izaten laguntzen duzue, natura-, arkitektura- eta kultura-ondare ikaragarria baitugu..., eta arreta berezia jartzen duzue lehen sektorearen mantentzean eta tokiko produktuen defentsan ".
Lehendakariak adierazi die, gainera, Batzar Nagusiak direla bere aliatuak berehalako eta etorkizuneko erronketarako.

30 urte baino gehiago sektorean espezializatzen eta profesionalizatzen

Euskadiko Landa Ostatuen Elkartea mota horretako establezimenduen titularren elkarte profesionala da, 1991n sortua. Gaur egun 231 establezimendu baino gehiago ditu, Euskadiko eskaintzaren % 75 baino gehiago.
Nekaturreko ordezkariek azaldu dutenez, elkartea bere estrategia indartzeko prozesuan murgilduta dago, landa-turismoaren erreferente gisa, arreta gobernantza-eredu berrietan jarrita (Hazirekin eta Landa Garapeneko Elkarteekin lankidetzan); belaunaldi-aldaketaren aukerak landuz eta ekintzailetzarako zubiak eraikiz.