Datorren astean hasiko da Batzar Nagusietan Arabarako Aurrekontuaren azalpena eta eztabaida - www.jjggalava.eus

           Datorren astean hasiko da Arabako Lurralde Historikoko Aurrekontuak Betearazteko Foru Arauaren Proiektuaren aurkezpena eta eztabaida Arabako Batzar Nagusietan 2026rako.

Mahaiak Arabarako Aurrekontua izapidetzeko egutegia onartu du gaur, zerga-neurrien egutegiez eta Batzar Nagusien berezko aurrekontuaz gain.

Gaur onartutako daten zerrendaren arabera, aste honetan, ostegunean edo ostiralean, Foru Gobernuak Aurrekontu proiektua emango dio Arabako parlamentuari. Batzar Nagusietako Mahaiak kalifikazioa eman ondoren, azaroaren 21era arteko epea irekiko da herritarrek beren alegazioak aurkez ditzaten, bai aurrekontu-proiektuari bai zerga-arauei dagokienez.

Proiektuen ohiko azalpena, sailka, azaroaren 19an, asteazkena, hasiko da eta aste osoan zehar luzatuko da. Ramiro González diputatu nagusiak Ogasun batzordearen bilerei hasiera emango die asteazkenean, goizeko 09:00etan. 10:00etan Cristina González ahaldun nagusiordeak hartuko dio lekukoa. Iñaki Gurtubai Berdintasun, Euskara eta Gobernantzako foru diputatuak eta Saray Zarate Garapen Ekonomiko eta Jasangarritasuneko foru diputatuak itxiko dute asteazken honetako agerraldien agenda, 11:30ean.

Gorka Urtaran Gizarte Politiketako foru diputatuak, Jon Nogales Mugikortasun Jasangarriko eta Bide Azpiegituretako diputatuak eta Noemí Aguirre Nekazaritza diputatuak euren proposamenak azalduko dituzte ostegun goizean, hilak 20.

Laura Pérez Borinaga Lurralde Oreka eta Lurralde Antolaketako diputatuak, Ana del Val Kultura eta Kirol diputatuak eta Itziar Gonzalo bigarren ahaldun nagusiordeak itxiko dute agerraldien astea.

Kalifikazioa eta zuzenketen eztabaida, abenduan

Halakorik balego, abenduaren 9an Mahaiak Arabako Aurrekontuari egindako osoko zuzenketak kalifikatuko ditu, eta abenduaren 12ko osoko bilkuran eztabaidatuko dira.

Osoko zuzenketak aurrera egiten ez badu, egun horretan bertan kalifikatuko dira zuzenketa partzialak, eta abenduaren 15ean (astelehena) eta 16an (asteartea) aztertuko dira Ogasun batzordean.

Batzorde horrek irizpena emango du, eta osoko bilkurak berretsi beharko du, abenduaren 19an, ostirala. Osoko bilkura horretan 2026rako aurrekontu-proiektua eta zerga-neurrien proiektua berretsi beharko dira.

Batzar Nagusien aurrekontua
Aldi berean, prokuradoreek Arabako parlamenturako berezko aurrekontua eztabaidatu eta bozkatuko dute egun horietan. Batzar Nagusien funtzionamendurako kontuen proiektua azaroaren 25ean, asteartea, onartuko du Mahaiak. Zuzenketak egiteko epea hasiko da egun horretan, abenduaren 3ra arte. Abenduaren 11n, ostegunean, Araudi eta Barne Gobernuaren batzordeak, araugintzarako gaitasun osoa duenak, Arabako ganberaren aurrekontua bozkatuko du.