Gizarte zerbitzuei eta desgaitasunari buruzko txostenak azken txostena onartu du aho batez - JJGG-BBNN

Batzar Nagusiek Araban desgaitasuna duten pertsonak artatzen dituzten gizarte-zerbitzuen egoera eta etorkizun hurbila aztertu dituzte azken urtean, 2025eko martxoan onartu zen ponentzia espezifiko baten bidez.

Batzarkide-talde guztietako ordezkariek, Mistoa-Vox taldekoek izan ezik, lantalde honetan parte hartu dute. Bertan, Hirugarren Sektoreko 29 elkartek eta kolektibok, Gizarte Politiketako Foru Saileko maila guztietako ordezkariek, INDESA bezalako erakundeek eta hainbat zerbitzutako langileen batzordeek euren ikuspuntua partekatu dute. Guztira, 49 pertsonak agerraldia egin dute Vicente Goikoetxea kaleko Batzar Nagusien egoitzan.

Ponentzian egindako 13 lan-saioetan, ASAFES, EHLABE, EGINAREN EGINEZ, AEMAR, ARABAKO GORRAK, ATECE, TALUR, ASOCIACION CONTRA EL CANCER DE ÁLAVA, ITXAROPENA, ASPANAFOA, OREKABIDE, ASCUDEAN, ASPACE, ARABARNEE, BERRITZEGUNE eta AUTISMO ARABA elkarteek hartu dute hitza. Gainera, DOWN ORBEk, APDEMAk, ILUNIONek, ASPASORek, ASASAMek, RAEPek, AEDISAk, LABORAL JUDIMENDIk, Gorbeialdea IGEk eta hainbat sindikatuk idatziz bidali dituzte beren gogoetak, Batzar Nagusiek bidalitako galdetegi baten bidez.

Claudia Venceslao Pueyo (EH-Bildu) izan da lantalde honen koordinatzaile. Lantaldearen helburua da dibertsitate funtzionala duten pertsonen errealitatearen analisia eta diagnostikoa egitea, beren bizi-ibilbidearen garapen-eremu guztietan, eta kolektibo horrek eta haren familiek alderdi garrantzitsuetan (inklusioa, autonomia pertsonala, bizitza independentea, garapena eta parte-hartzea, besteak beste) jasaten dituzten zailtasunak eta oztopoak identifikatzea eta zehaztea.