Gizarte politiketako eta Garapen Ekonomikoko, Berrikuntzako eta Erronka demografikoko foru diputatuek agerraldia egingo dute datorren astean batzordean - www.jjggalava.eus

Ahalmen handiko bideak finantzatzeko eta kudeatzeko sistemari buruzko ponentziak beste lan-saio bat egingo du astelehenean. 9:00etatik aurrera, Miguel Mayorga Cardenas Lurraldearen Kudeaketan eta Garraio Azpiegituretan doktore eta Kataluniako Unibertsitate Politeknikoko irakasleak eta Jose Luis Ordoñez Fernandez geologo eta Andaluziako Juntako Mugikortasun zuzendari nagusi ohiak hartuko dute parte.

Ohi bezala, asteartean Mahaiaren asteroko bileraren txanda izango da eta asteazkenean beste osoko bilkura bat egingo da Probintziako Jauregi-Etxean. Hala badagokio, Arabako Foru Aldundiaren eta Burgosko Probintzia Aldundiaren arteko lankidetza-esparru-akordioa, Trebiñuko enklabeari dagokionez, berresteko foru-arauaren proiektua onartuko da eta, ondoren, Foru Gobernuaren martxoaren 23ko 3/2021 Zerga Premiazko Dekretu Arauemailea baliozkotu edo indargabetuko da, COVID-19rekin lotutako ezohiko neurri gehigarriak onartzeko. Gai-zerrendako azken gai arautzaile gisa, Ogasun, Finantza eta Aurrekontu Batzordeak tresna teknologikoak erabiltzeko betebeharra ezartzen duen foru-arauaren proiektuari buruz emandako irizpena eztabaidatu eta, hala badagokio, onartuko du osoko bilkurak.

Bestalde, saioaren bigarren erdian hiru mozio eztabaidatuko dituzte, parlamentu honek foru gobernuari ezarri zion funtzioa betetzeko. Lehenik, Elkarrekin Araba (Podemos-Ezker Anitza-Equo) batzarkide taldeak Arabako Natur Zientzien Museoaren etorkizunari buruzko mozioa proposatuko dio osoko bilkurari, eta, ondoren, Arabako Popularrak batzarkide taldeak Ekarpenen Legeari buruzko eztabaida bultzatuko du. Saioa amaitzeko, Elkarrekin Araba (Podemos-Ezker Anitza-Equo) batzarkide taldearen beste ekimen-mozio bat eztabaidatuko da, Lurralde Historikoan energia berriztagarrien eta jasangarrien instalazioak behar bezala hedatzea lehenbailehen ahalbidetzeko eta bideragarri egiteko.

Ostegunean, apirilak 22, Gizarte Ongizate batzordeak bilera berri bat egingo du. Emilio Sola Gizarte politiketako foru diputatuak bi aldiz egingo du agerraldia. Batetik, Arabako adineko pertsonen nahi gabeko bakardadeari aurre egiteko erronkari buruzko eraikuntza kolektiboaren estrategia ezagutarazteko, eta, bestetik, txertaketa-kanpainaren ondoren eta martxoaren 2ko 16/2021 Foru Aginduan oinarrituta, adinekoen egoitza-zentroetan aplikatzen diren neurri murriztaileak aztertzeko.

Azkenik, ostiralean Ekonomiaren Garapenaren, Berrikuntzaren eta Erronka demografikoaren batzordea bilduko da, eta bertan agertuko da Pilar García de Salazar diputatu nagusiordea eta arloko foru diputatua, gaur egun gune osoan edo zati batean zuntz bidez edo LTE teknologiaz loturarik gabe jarraitzen duten herrien berri emateko.

Batzordeen bilerak eta osoko bilkura zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.