Diputatu nagusia eta Lurralde Orekako foru diputatua batzordean izango dira aste honetan - www.jjggalava.eus

Lurralde Oreka eta Lehendakaritza, Euskara, Berdintasuna, Lankidetza eta Giza Eskubideen batzordeak izango dira asteko agendaren protagonistak Arabako Batzar Nagusietan, osoko bilkurak asteazkenean beste saio bat egin ondoren. Bilkura horretan lau mozio eztabaidatuko dira batzarkide taldeek proposatuta. Ohikoa denez, gainera, bihar, asteartean, Mahaiaren eta Bozeramaileen Batzarraren asteroko bileren txanda izango da. Bilera horietan, besteak beste, otsailaren 15ean, asteazkenean, egingo den osoko bilkuraren gai-zerrenda adostuko da.

Otsailaren 8rako, asteazkenerako, deituta dagoen osoko bilkuraren gai-zerrendak lau mozio eztabaidatzea aurreikusten du, horietako lehena EH Bildu batzarkide taldearen ekimenez, Foru Aldundiari Legardagutxiko errota eta bere ingurua aztertu eta txukuntzeko eta parke txiki bat sortzeko eskatzeko. Ondoren, Arabako Popularrak taldeak Gasteizko etxebizitzen legez kanpoko okupazioa geldiaraztea proposatuko du, Elkarrekin Arabak (Podemos-Ezker Anitza-Equo) Ganberara hedatuko du Zadorra Ibaiko, Gasteizko Mendietako, Izkiko eta Entziako KBEetan korridore ekologiko jarraitu bat sortzea eta, saioa amaitzeko, EH Bilduk bigarren mozio bat aurkeztuko du, kasu honetan Gasteizen zein Araba osoan energiaren prezioen gorakadari aurre egiteko premiazko neurri batzuk eskatzeko.

Ostegunean iritsiko zaio txanda Lurralde Orekako batzordeari. Hasteko, Irma Basterra alorreko foru diputatuak bi agerraldi egingo ditu, alde batetik, 2022ko uztailaren 7an kontzejuek energia-komunitateetan duten parte-hartzeari buruzko txostenaren berri emateko, eta, bestetik, Lurralde Historikoko Larrialdi Plana eguneratzeari buruzko azalpenak emateko. Era berean, batzorde horretako kideen aurrean Arabako Suhiltzaileen Erakunde Autonomoko Langileen Batzordeko ordezkariak ere agertuko dira, zerbitzuaren egungo egoera aztertzeko.

Astea amaitzeko, ostiralean Lehendakaritza, Euskara, Berdintasuna, Lankidetza eta Giza Eskubideen batzordearen beste bilera bat egingo da. Lehenik eta behin, Ramiro González diputatu nagusiak Arabako Foru Aldundiaren gobernuaren, antolaketaren eta araubide juridikoaren foru-arauaren proiektua azalduko du, Ogasun, Finantza eta Aurrekontu, eta Kultura eta Kirol foru diputatuekin batera, Kexaako monumentu-multzoa eskuratzeko prozesua azaldu aurretik. Saio honetan, gobernuaren buruak hirugarren agerraldi bat egingo du, Urbide Ur Partzuergoari buruzko azalpenak emateko. Ondoren, Berdintasunerako eta Giza Eskubideetarako foru-zuzendariak aurkeztuko du Foru Aldundiaren Emakumeen eta Gizonen Berdintasunerako V. Plana (2022-2026). Amaitzeko, Mugarik Gaberen eskutik, Araban eta Hondurasen ingurumenaren, lurraren eta lurraldearen defentsan adituak diren pertsonek Bizitza Jokoan izeneko giza eskubideei eta bortxatutako naturari buruzko ikerketa aurkeztuko dute.

Batzordeen bilerak, eta baita osoko bilkura ere, zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.