2021erako aurrekontuei buruzko foru-arauaren proiektuak osoko zuzenketen bozketa gainditu du - www.jjggalava.eus
Albisteak
2021erako aurrekontuei buruzko foru-arauaren proiektuak osoko zuzenketen bozketa gainditu du
EH Bildu eta Elkarrekin Araba (Podemos-Ezker Anitza-Equo) batzarkide taldeek aurkeztutako osoko zuzenketak eztabaidatu ostean, osoko bilkurak atzera bota du kontuak itzultzea
EH Bildu eta Elkarrekin Araba batzarkide taldeek (Podemos-Ezker Anitza-Equo) aurkeztutako osoko zuzenketen bozketa gainditu ondoren, Arabako Lurralde Historikorako Aurrekontuen 2021eko Foru Arauaren proiektua izapidetzen jarraitzen da Batzar Nagusietan. Gaur goizean egindako osoko bilkurak atzera bota du kontuak Foru Gobernuari itzultzea.
Horrela, eta Arabako Legebiltzarreko Mahaiak Lurralde Historikoko kontu publikoak Ganberan eztabaidatu eta onartzeko finkatutako tramitazio-egutegiak jasotzen duen bezala, Ogasun, Finantza eta Aurrekontu batzordeak batzarkideek aurkeztutako 268 zuzenketa partzialak eztabaidatuko ditu datorren astelehen eta asteartean, urtarrilaren 25ean eta 26an.
Astelehenean, urtarrilaren 25ean, jardunaldia 9:00etan hasiko da, diputatu nagusiaren aurrekontuari dagozkion zuzenketen eztabaidarekin. Jarraian, Enplegu, Merkataritza, Turismo Sustapeneko eta Foru Administrazioa (10:40), Lurralde Oreka (11:45), Ekonomiaren Garapena, Berrikuntza eta Erronka demografikoa (12:45) eta Nekazaritza (14:45) sailen kontuak izango dira. Arratsaldean, 16:30etik aurrera, batzordeak Bide Azpiegituretako eta Mugikortasuneko eta Ingurumen eta Hirigintzako (17:30) departamentuen aurrekontuei aurkeztutako zuzenketak aztertuko ditu.
Hurrengo egunean, bilera 9:00etan hasiko da berriro, eta Kultura eta Kirol, Gizarte Politika (10:15) eta Ogasun, Finantza eta Aurrekontu (11:45) sailetako kontuak aztertuko dira.
Batzordeak egiten dituen bozketen ondoriozko irizpena, erregelamenduak bilkura honi ematen dion arautze-ahalmen osoaren ondorioz boto haztatuz arautuko dena, osoko bilkurak berretsi behar izango du datorren ostiralean, urtarrilaren 29an.
Izapidetze-prozesua
Arabako Lurralde Historikorako Aurrekontuei buruzko foru-arauaren proiektua, abenduaren 17an Ogasun, Finantza eta Aurrekontuetako foru-diputatu Itziar Gonzalok Batzar Nagusietako presidente Pedro Elosegiri formalki emana, egun horretan bertan hasi zen izapidetzen Legebiltzarrean, Mahaiak kalifikazioa emanda.
Behin ekitaldia formalizatuta, non Itziar Gonzalo Ogasun, Finantza eta Aurrekontuetako foru diputatuak onartu berri den proiektuari buruzko USB memoria bat eman zion Pedro Elosegi Arabako legegileko presidenteari modu sinbolikoan, Mahaiak eta Bozeramaileen Batzordeak argi berdea eman zioten foru gobernuko kideen agerraldien lehen hitzorduari, dagozkien partidak azaltzeko. Aurkezpen horien ondoren, epe bat ireki zen proiektua osorik, testu artikulatuan, atal oso batean edo bere programa, kapitulu, artikulu, kontzeptu eta partida eta memorian zuzendu ahal izateko, batzarkide taldeen bitartez.