Ingurumen eta Hirigintza eta Bide Azpiegituretako eta Mugikortasuneko foru diputatuak batzordean izango dira datorren astean - www.jjggalava.eus
Albisteak
Ingurumen eta Hirigintza eta Bide Azpiegituretako eta Mugikortasuneko foru diputatuak batzordean izango dira datorren astean
Ingurumen eta Hirigintza eta Bide Azpiegituretako eta Mugikortasuneko foru diputatuak batzordean izango dira datorren astean
Halaber, Araba Tren Sozialaren Alde Plataformak, Apdemako eta Ariznavarra egoitzako enpresa-batzordeek, Gasteizko Elizbarrutiko Caritaseko idazkari nagusiak eta ESK, LAB, CCOO eta ELA sindikatuek parte hartuko dute batzordeetan
Arabako Lurraldeko legegintza-astea astelehen goizean hasiko da, Ingurumen eta Hirigintza batzordearen bilerarekin. 8:30etik aurrera, Ramiro Gonzalez diputatu nagusiak EH Bildu batzarkidearen galdera bati erantzungo dio, Trebiñu Araba Bizikletaz programan eta Bizikleta Bideen eta Ibilbide Berdeen Foru Arauan kanpo uztearen arrazoiei buruz. Ondoren, Josean Galera arloko foru diputatuak agerraldia egingo du, alde batetik, Inglares ibaiaren emari ekologikoa Ocio eta Berganzo inguruan betetzen ari den azaltzeko, eta, bestetik, Valderejon eta inguruko beste leku batzuetan sai arreen kopurua murriztu den azaltzeko.
Ohikoa denez, asteartean, Mahaiko kideen asteroko bileraren txanda izango da, eta, goizean bertan, Ganberako berdintasun-taldea ere bilduko da, 2022-2025eko Emakumeen eta Gizonen Berdintasunerako I. Planean proposatutako ekintzei buruzko legealdiaren azken jarraipena egiteko.
Martxoaren 29rako, asteazkenerako, XI. legealdiko azken osoko bilkuraren gai-zerrendak bost mozio eztabaidatzea aurreikusten du, Arabako eta Bizkaiko Foru Aldundien arteko lankidetza-hitzarmena berresteko foru-arauaren proiektua, N-240 errepidean Ubideko udalerrira sartzeko hegoaldeko elkargunea berrantolatzeko eta hobetzeko obrak egiteko, Ganberak bozketa egin ondoren.
Lehenengo mozioa, EH Bildu batzarkide taldearen ekimenez, oinarrizko elikagaien BEZaren jaitsieraren ondorioei buruzkoa izango da; hurrengo biak, berriz, Arabako Popularrak taldeak aurkeztutakoak, Espainiako Gobernuko Berdintasunerako Estatu Idazkaritzaren eta ministroaren berehalako kargugabetzearen eskaera onartzea eta Foru Gobernuari familia-ingurunean zaintzaileentzako prestazioaren zenbatekoak igotzeko eskatzea bilatuko dute. Jarraian, Elkarrekin Araba (Podemos-Ezker Anitza-Equo) batzarkide-taldeak amiantoaren biktimentzako konpentsazio-funts bat sortzeko urriaren 19ko 21/2022 Legetik eratorritako konpentsazioak PFEZn salbuesteari buruzko eztabaida hasiko du, eta EH Bilduren mozioak itxiko du bilkura, kuadrillek izan behar dituzten giza baliabideen artean idazkari-kontu-hartzailearen figura sartzeari buruzkoa.
Ostegunean iritsiko zaio txanda Bide Azpiegituren eta Mugikortasunaren batzordeari. Hasteko, Carlos Ibarlucea foru diputatuak agerraldia egingo du A-3110 errepidearen egoera txarraren berri emateko, Alegria-Dulantzitik Gasteizerako norabidean, N-104 errepideko bidegurutzeraino, Araba Tren Alde plataformaren ordezkaritza bat batzordean agertu baino lehen, Burgosen, Araban eta Nafarroan tren publiko eta sozial bat egiteko proposamena eta trazaduren analisia egiteko proiektua azaltzeko. Saioaren bigarren zatian hiru mozioren eztabaida jasotzen da. Lehenengo biek, Elkarrekin Araba (Podemos-Ezker Anitza-Equo) batzarkide-taldeak eskatuta, Aiaraldeko herritarrek Galdakaoko Ospitalearekin zuzeneko joan-etorriko zerbitzua izatea bilatuko dute, baita Arabako garraio-azpiegituren soinu-efektua minimizatzera bideratutako neurri zuzentzaileak bultzatzea ere. Azkena, berriz, EH Bilduk proposatutakoa, A-2622 errepidea egokitzeko lanek Pauleko igeltsu-fabrikako arkeologia industrialeko hondakinei ez eragitea aztertuko du.
Astea amaitzeko, ostiralean Gizarte Ongizateko batzordearen beste bilera bat egingo da, eta bost agerraldi egingo dira. Lehenik eta behin, Apdemako Enpresa Batzordeko ordezkariek negoziazioaren egoeraren eta erakunde horretako zuzendaritzarekin sinatutako aurreakordioaren finantzaketaren berri emango dute, eta, ondoren, Ariznabarra egoitzako enpresa-batzordeari emango diote bidea. Azken horiek gauza bera egingo dute egoitza horretako hitzarmenaren negoziazioa dagoen egoerari buruz. Jarraian, Gasteizko Elizbarrutiko Caritaseko idazkari nagusiak agerraldia egingo du, Gobernu Zentralak Arana klinika zaharrean proiektatzen duen Errefuxiatuentzako Harrera Zentro berriari eta Gasteizen beharrizan-egoerak areagotzeari buruz duen iritzia azaltzeko. ESK, LAB, CCOO eta ELA sindikatuek Esku Hartze Sozialeko III. Hitzarmenaren negoziazio prozesua azaltzeko egingo duten agerraldiak amaiera emango dio bilera honi.
Batzordeen bilerak, eta baita osoko bilkura ere, zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.