Ekonomiaren Garapen, Berrikuntza eta Erronka demografikoko diputatuak eta Tubacexeko enpresa-batzordeak agerraldia egingo dute - www.jjggalava.eus

Asteazkenean, hilak 4, Arabako Batzar Nagusietako osoko bilkurak bilera egingo du berriro, Foru Aldundiaren gobernua kontrolatzeko Saioa burutzeko asmoz. 9:30etatik aurrera, gobernukideek batzarkideek egindako zazpi galdera eta lau interpelazio erantzun beharko dituzte. Ostegunean eta ostiralean, Garapen Ekonomikoaren, Berrikuntzaren eta Erronka demografikoaren eta Enplegu, Merkataritza eta Turismo Sustapenaren eta Foru Administrazioaren batzordeen txanda izango da, hurrenez hurren.

Ohi bezala, bihar, asteartean, Mahaiaren eta Bozeramaileen Batzordearen asteroko bilerak izango dira. Azken horrek azaroaren 11n, asteazkenean, egingo den osoko bilkuraren gai-zerrenda adostea izango du egitekoen artean. Asteazkenean, hilaren lehen egunean bezala, Arabako Batzar Nagusiek foru gobernuaren kontrolerako osoko bilkura egingo dute Probintzia Jauregian.

Hasteko, diputatu nagusiak Aiarako Kuadrillan tren-zerbitzua murrizteari eta Arabako Foru Aldundiak jaiotza-tasa, familia eta erronka demografikoari aurre egiteko bultzatu nahi dituen neurriei buruzko bi galderari erantzungo die. EH Bildu eta Arabako Popularrak batzarkide taldeek egin dituzte galdera horiek. Jarraian, Garapen Ekonomiko, Berrikuntza eta Erronka demografikoko foru diputatu eta diputatu nagusiordeak  urtarrilaren 24ko 9/2020 mozioari buruz orain arte egindako ekintzen berri emango du, gure herrietako banku-erakundeen itxieraren problematikari buruz, bai eta bere sailak Arabako landa-ingurunean dagoen belaunaldien arteko eten digitala ezabatzeko zer egin duen ere, EH Bildu eta Elkarrekin Araba (Podemos-Podemos) batzarkide taldeek galdetuta.

Gero, batzarkide-talde horrek Enplegu, Merkataritza eta Turismo Sustapeneko eta Foru Administrazioko foru diputatuari galdetuko dio ea zer egiteko asmoa duen bere sailak Arabako merkataritzaren eta ostalaritzaren sektoreetan pandemiak eragindako kalte ekonomikoak arintzeko. Ziurrenik, Covid-19ren hedapenaren aurkako prebentzio-neurri gisa espazioa aireztatzeko lehen atsedenaldiaren ondoren, Gizarte politiketako foru diputatuari galdetuko diote, alde batetik, EH Bildu batzarkide taldeak ea Aldundiak benetako alternatibak emango dizkien desgaitasuna duten gazteak beren kargura dituzten familiei eguneko arreta zentro batean plaza bat eskuratzeko zain dauden hilabeteetan eta, bestalde, Arabako Popularrak batzarkide taldeak adimen-urritasuna duten pertsonentzako eguneko zentro bat planifikatzeari eta abian jartzeari buruz. Diputatu honen osoko bilkuran parte hartzea amaitzeko, EH Bildu batzarkide taldeak erizaintzako profesionalek eta erizaintzako laguntzaileek Covid-19 duten pertsonentzako Zadorra Erreferentzia Zentroan dituzten lan-baldintzei buruz egindako galderari erantzungo dio.

Bilkuraren azken zatian, Elkarrekin Araba (Podemos-Ezker Anitza-Equo) batzarkide taldeak  Ingurumen eta Hirigintzako foru diputatuari galdetuko dio Alegríako kanalaren jarraipenari edo ezabatzeari buruz foru gobernuak dituen asmoei buruz, Arabako Popularrak batzarkide taldeak gauza bera egingo du Bide Azpiegituretako eta Mugikortasuneko foru diputatuarekin, bere sailak Arabarako Errepideen Plan Integralarekin duen konpromiso-maila azal dezan, eta bukatzeko batzarkide talde honek berak Kultura eta Kiroleko titularrari galdetuko dio bere sailak urtea ixteko aurreikusten duen xedapenaren gauzatze-ehunekoari eta gauzatu gabe geratzen diren partidei buruz.

Urriaren 8an, ostegunean, Ekonomiaren Garapen, Berrikuntza eta Erronka demografikoaren batzordearen bilerarako deialdia egingo da. Bilera horretan, Pilar García de Salazar lehenengo diputatu nagusiorde eta Ekonomiaren Garapen, Berrikuntza eta Erronka demografikoko foru diputatuak Tuestako tomate hidroponikoen proiektuari buruz EH Bildu batzarkide taldeak egindako galderari erantzun beharko dio. Halaber, Tubacex Tubos Inoxidables y Acería de Álava enpresa-batzordeko ordezkariek agerraldia egingo dute sortutako egoeraren aurrean Arabako Batzar Nagusien babesa azaltzeko eta eskatzeko, enpresak 150 langile kaleratuko dituela iragarri ondoren.

Astea ostiralean amaituko da, Enplegu, Merkataritza eta Turismoaren Sustapenaren eta Foru Administrazioaren batzordearen esparruan, Arabako Popularrak batzarkide taldeak aurkeztutako Arabako merkatarien elkarteekin hitzarmenak abian jartzeko mozioaren eztabaidarekin.

Batzordeen bilerak, bai eta osoko bilkurarena ere, streaming bidez jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.