Legegintza-astea Ogasun, Finantza eta Aurrekontu batzordearen bilerarekin hasiko da astelehenean - www.jjggalava.eus

Ogasun, Finantza eta Aurrekontu batzordearen bilerak astelehenean irekiko du asteko agenda Arabako Legebiltzarrean. 9:00etatik aurrera, Ramiro González diputatu nagusiak, Itziar Gonzalo arloko foru diputatuaz lagunduta, Ekonomia Itunaren Batzorde Mistoak 2022ko azaroaren 17an egindako bileran hartutako erabakien berri emango du. Ondoren, batzordeko kideek Herri Kontuen Euskal Epaitegiak 2023ko aldirako fiskalizazio-lehentasunak adostu beharko dituzte, eta, bilera amaitzeko, batzordeak aurrekontuen foru-arau orokorraren proiektuari buruzko irizpena eztabaidatuko eta, hala badagokio, onartuko du. Batzordean onartu ondoren, osoko bilkurak berretsi egin beharko du.

Foru Ganberan ohikoa denez, asteartean Mahaiaren eta Bozeramaileen Batzarraren asteroko bileren txanda iritsiko da. Bilera horietan, besteak beste, 2023ko lehen osoko bilkuraren gai-zerrenda adostuko da, urtarrilaren 18an (asteazkena) ospatuko dena.

Ostegunean, hilak 12, Arabako Batzar Nagusietan Lurralde Orekaren batzordea biltzea aurreikusten da. Gai-zerrendan sar daitezkeen beste gai batzuen artean, Irma Basterra alorreko foru diputatuak agerraldia egingo du Arabako Suhiltzaileak Foru Erakundearen enplegu publikoaren eskaintzaren baitan azaroaren 26an egindako probaren emaitzen ondorioz sortutako egoera azaltzeko, baita egoera hori konpontzeko hartuko dituen neurriak azaltzeko ere. Era berean, Erriberabeitiko udalerriaren izena aldatzearen onarpena ere eztabaidatuko du batzordeak.

Batzordeen eta osoko bilkuraren bilerak zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.