Ogasun, Finantza eta Aurrekontu batzordeak astelehenean irekiko du legegintza-astea Araban - www.jjggalava.eus

Arabako Lurraldeko legegintza-astea astelehen goizean hasiko da, Ogasun, Finantza eta Aurrekontu batzordearen bilerarekin. 9:00etatik aurrera, Ramiro González diputatu nagusiak, Itziar Gonzalo arlo horretako foru diputatuarekin batera, agerraldia egingo du bere kideen aurrean, 2022ko abenduaren 27an Kontzertu Ekonomikoaren Batzorde Mistoak egindako bileran hartutako erabakien berri emateko. Ondoren, Ana Helguera Herri Kontuen Euskal Epaitegiko presidenteak Arabako Lurralde Historikoaren 2020ko Kontu Orokorraren Fiskalizazio Txostena azalduko du, eta, saioa amaitzeko, batzordeak Elkarrekin Araba (Podemos-Ezker Anitza-Equo) batzarkide taldeak aurkeztutako mozio bat eztabaidatuko du, Arabako Foru Aldundiari eskatzeko langile autonomoei PFEZaren aitorpenak egiten lagun diezaiela.

Foru Ganberan ohikoa den bezala, asteartean Mahaiaren eta Bozeramaileen Batzarraren asteroko bileren txanda iritsiko da. Bilera horietan, besteak beste, otsailaren 22an, asteazkenean, egingo den osoko bilkuraren gai-zerrenda erabakiko da.

Asteazkenean, bestalde, Arabako legegileak beste osoko bilkura bat egingo du, eta, hala badagokio, Arabako Lurralde Historikoko Mendiei buruzko martxoaren 26ko 11/2007 Foru Araua aldatzen duen foru-arauaren proiektuari buruzko irizpena onartzearekin hasiko da, batzarkide-taldeek aurkeztutako lau mozioei (gai-zerrenda barne) heldu baino lehen.

Lehenengoak, Elkarrekin Araba (Podemos-Ezker Anitza-Equo) batzarkide taldeak aurkeztutakoak, Arabako Lurralde Historikoan Fortuna Handien Elkartasunaren Aldi Baterako Zerga 2022ko ekitaldiko aitorpenari dagokion hurrengo zerga-kanpainan aplikatzen dela bermatzea eskatuko du; bigarrenak, berriz, EH Bilduren ekimenez, Lakua eta Zadorra egoitzak eraikitzeko eta mantentzeko kontratuei helduko die. Ondoren, Arabako Popularrak batzarkide taldeak osoko bilkurari proposatuko dio Arabako Foru Aldundiak bere eskumeneko eta titulartasuneko autobus-lineak modu integralean kudeatzea, eta, azkenik, Elkarrekin Arabak (Podemos-Ezker Anitza-Equo) Gasteizen dagoen bizitegi-larrialdia eramango du Ganberara.

Ostegunean, Nekazaritza batzordea bilduko da Arabako Batzar Nagusien egoitzan, lehenik eta behin, Eduardo Aguinaco alorreko foru diputatuaren agerraldi bikoitza hartzeko, alde batetik, Berriztagarrien ALPren aurrerapenak Araban aurreikusten duen garapenaren aurrean Nekazaritza Garapen Zerbitzuak egindako txostenaren inguruko azalpenak emateko, eta, bestetik, nekazaritza eta abeltzaintzako jardunbide egokien akreditazioei dagokienez nola jardungo duen eta egiaztapen horiek egiteko zer baliabide dituen jakinarazteko. Batzordeak, halaber, EH Bilduk Ardoaren Etxearen funtzioei buruz proposatutako mozio bat eztabaidatuko du.

Astea amaitzeko, ostiralean Ogasun, Finantza eta Aurrekontuen batzordea bilduko da berriro. Horren aurrean, Ramiro González diputatu nagusiak, Itziar Gonzalo arlo horretako foru diputatuarekin batera, agerraldia egingo du Euskadiko Finantza Kontseiluak otsailaren 15ean egingo den bilkuran aztertutako gaien berri emateko.

Batzordeen bilerak, eta baita osoko bilkura ere, zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.