Marrazketa eta idazketa II. eskola-lehiaketaren sarien banaketa - www.jjggalava.eus

Arabako Batzar Nagusiek ekitaldi xume bat egin dute gaur arratsaldean, abenduan abian jarritako II. eskola marrazketa eta idazketa lehiaketaren sariak banatzeko. Saritutako ikasleek eta Arabako legegileen mahaikideek parte hartu dute ekitaldian. Azken horiek, sariak emateaz gain, epaimahaiko kide gisa ere aritu dira.

Pedro Elosegi Arabako Batzar Nagusietako presidenteak ongietorria eman die saridunei lurralde parlamentuaren egoitzan, marrazki eta erredakzio lehiaketetako sariak banatzen hasi aurretik. Lehenengo kategorian, 'Araba, gure lurraldea' izenburupean, parte-hartzaileek Arabako Lurralde Historikoa haientzat zer den adierazten zuen marrazki bat aurkeztu behar zuten. Kategoria honetako irabazlea Izar Pereda Espina izan da, Gasteizko Umandi ikastolako ikaslea, eta ordenagailu eramangarri bat jaso du.

Bestalde, idazketa-lehiaketan, lehenengo eta bigarren sariak CEU Virgen Niñako ikasleentzat izan dira, Arabako hiriburuan ere. Jon Montoya Morenok eskuratu du lehen saria, ordenagailu eramangarri bat ere baduena; Iciar Busto Burguik, berriz, bigarren postua eskuratu du, eta, horregatik, 10,4 hazbeteko Android tableta jaso du, tresna horiek, maila pertsonalean ez ezik, prestakuntza akademikoan ere baliagarri izan dakizkion.

Erakundearen ezagutza gizarteko hainbat esparrutan zabaltzeari begira, Arabako Batzar Nagusiek funtsezkotzat jo dute lan hori adin goiztiarrenetatik hastea, horiek izango baitira Arabaren etorkizuna ekarriko dutenak, eta botoa emateko eskubidea erabili ahal izango dutenak edo, are gehiago, datozen urteetan prokuradore gisa parte hartu ahal izango dutenak. Horrela, Arabako Parlamentuak, besteak beste, Lehen Hezkuntzako azken mailetako eta Derrigorrezko Bigarren Hezkuntzako lehen mailetako ikasleei zuzendutako jarduera hauek antolatu ditu.