null HKEEko presidentea eta Lurralde Orekako foru diputatua datorren astean agertuko dira batzordean

HKEEko presidentea eta Lurralde Orekako foru diputatua datorren astean agertuko dira batzordean

Batzordeen aretoa
2021 ots. 05

Halaber, ostegunean Berganzoko Administrazio Batzarreko presidenteak hitz egingo du batzordearen aurrean eta asteazkenean beste osoko bilkura bat egingo da, besteak beste, Kuadrillen Foru Arauaren aldaketa aztertzeko

Jose Luis Bilbao Herri Kontuen Euskal Epaitegiko presidenteak astelehenean irekiko du aste legegilea Arabako Legebiltzarrean. Ogasun, Finantza eta Aurrekontu batzordearen aurrean egingo du, Lurralde Historikoko 2018ko kontu orokorraren fiskalizazio-txostena azaltzeko.

Ohi bezala, asteartean Mahaiaren eta Bozeramaileen Batzordearen asteroko bileren txanda izango da. Azken horrek, besteak beste, otsailaren 17an, asteazkenean, egingo den osoko bilkuraren gai-zerrenda adostuko du, hilaren 10ean Probintziako Etxe-Jauregiak aste horri dagokion bilkura hartu ondoren. Arabako Lurralde Historikoko Kuadrillen azaroaren 20ko 63/1989 Foru Araua aldatzen duen foru arau proiektuari buruzko irizpena onartzearekin hasiko da. Aurrera eginez gero, orain arteko Kanpezu-Arabako Mendialdeko Kuadrilaren izen ofizialaren aldaketa formalki ezarriko da, eta horrek udal-erreferentzia galduko du Arabako Mendialdeko Kuadrila izena hartzeko.

Jarraian, osoko bilkurak jorratuko du Arabako Ondasun Higiezinen gaineko Zergari buruzko uztailaren 19ko 42/1989 Foru Araua aldatzeko foru-arauaren proposamena aintzat hartzea, Arabako Popularrak batzarkide taldearen ekimenez, eta, ondoren, hiru mozio eztabaidatuko dira.

Lehenengo biak EH Bildu batzarkide taldeak aurkeztu ditu, eta, alde batetik, Zergak Koordinatzeko Organoak ezohiko finantzaketa-mekanismoak bermatu ahal izateko neurri fiskal gehigarriak eta salbuespenezkoak aztertzea eta proposatzea proposatuko dute. Bestalde, Gizarte Zerbitzuen Euskal Sistemaren defentsa egingo dute, arretarako sare publiko artikulatu gisa. Amaitzeko, Arabako Popularrak batzarkide taldeak mozio berri bat eramango du osoko bilkurara, gaixotasun mentala duten eta DSBEtik kanpo dauden pertsonei premiazko konponbidea eskatzeko.

Ostegunean, hilak 11, Lurralde Orekaren batzordearen bilerarako deialdia egingo da. Bertan, lehenik eta behin, Berganzoko Administrazio Batzarreko Presidente-Erregidorea agertuko da, Virgen del Campo baselizaren egungo egoeraren berri emateko. Gai-zerrendako bigarren puntu gisa, deialdian, hala adosten bada, Irma Basterra Lurralde Orekako foru diputatuaren agerraldia ere jasotzen da, zeinak Arabako toki-erakundeen ezustekoei eta larrialdiko obrei aurre egiteko diru-laguntzen berri emango baitu.

Azkenik, ostiralerako, gaitasun handiko bideen finantzaketa- eta kudeaketa-sistemari buruzko ponentziaren beste bilera bat deitu dute, eta bertan agertuko dira Arabako Foru Aldundiko Bide Azpiegituretako zuzendaria eta Errepide Zerbitzuko burua.

Batzordeen bilerak eta osoko bilkura zuzenean jarraitu ahal izango dira Arabako parlamentuaren mediatekaren bidez (http://mediateca.jjggalava.eus/live), eta amaitu ondoren, osorik eta gai-zerrendako puntuka eta prokuradoreen esku-hartzeka zatituta ikusi ahal izango da, honako aplikazio beraren bidez.